رییس جمهور غنی و رؤسای جمهور تاجیکستان و ازبیکستان با هم دیدار کردند

جوزا ۲۰, ۱۳۹۷ fawad hariva افغانستان, خبر 0

رییس جمهور غنی و امام علی رحمان رییس جمهور تاجیکستان در حاشیه نشست شانگهای با هم دیدار کردند.

بربنیاد خبرنامۀ ریاست‌جمهوری کشور، سران دوکشور روی تقویت و گسترش همکاری‌های دوجانبه و منطقه‌یی، به‌ویژه همکاری‌های اقتصادی، بازرگانی، امنیتی و مبارزه با هراس‌افگنی، گفت‌وگو کردند.

آقای رحمان، از روند صلح به رهبری دولت افغانستان و اعلام آتش‌بس یک‌جانبه با طالبان، پشتیبانی و تأکید کرده است که افغانستان با ثبات به‌سود همۀ کشورهای منطقه است.

از سویی‌هم، رییس‌جمهورغنی نقش تاجیکستان را در همکاری‌های اقتصادی و ترانزیتی منطقه‌یی مهم خوانده است. رییس جمهوری گفته است که تاجیکستان به‌عنوان صادرکنندۀ انرژی برق و افغانستان به‌مثابۀ ترانزیت‌کنندۀ انرژی برق، نقش به‌سزایی در اتصال منطقه‌یی و پیش‌رفت اقتصادی منطقه دارند.

در همین‌حال، رییس جمهور در یک دیدار دیگر با میرضیایف، رییس‌جمهور ازبیکستان، در بارۀ تقویت مناسبات میان دوکشور و موضوعات منطقه‌یی، نیز گفت‌وگو کرده است.

میرضایوف، در این دیدار گفته است ازبیکستان برای تحقق صلح با افغان‌ها کمک می‌کند و نیز کشورهای دوست و بین‌المللی را تشویق می‌کند که افغان‌ها را در موفقیت این روند، همکاری کنند.

دوجانب در بارۀ همکاری‌های بازرگانی و اقتصادی نیز تأکید کردند که اکنون یک دیدگاه بزرگ اقتصادی موجود می‌باشد و روابط تجارتی چین و افغانستان از طریق ازبیکستان، تقویت بیشتر خواهد یافت.