روسیه حضور جنگنده‌هایش در حمله‌ هوایی تخار را رد کرده است

سنبله ۰۵, ۱۳۹۷ fawad hariva افغانستان, جهان, خبر, دسته‌بندی نشده 0

مسوولان محلی در ولایت تخار می‌گویند که تحقیقات درباره حمله جنگنده‌های تاجیکستانی بر مواضع طالبان در ولسوالی درقد آغاز شده است.

صبح امروز گزارش‌هایی به نشر رسید که جنگنده‌های روسی مناطق مرزی میان افغانستان و تاجیکستان را بمباران کرده‌اند.

اما جواد هجری سخنگوی والی تخار گفته که جنگنده‌های تاجیکستانی مواضع طالبان را در ولسوالی درقد هدف قرار داده اند.

آقای هجری گفته که جنگنده‌های تاجیکستانی عصر روز گذشته مواضع طالبان را در ولسوالی درقد ولایت تخار بمباران کردند.

آقای هجری بیان داشته که تا هنوز جزئیات کامل از بمباران جنگیده‌های تاجیکستانی در دست نیست اما احتمالا تلفات زیادی به مافیای مواد مخدر و مخالفان مسلح وارد شده است.

او با بیان اینکه نیروهای نظامی تاجیکستان بدون هماهنگی با دولت افغانستان بالای ولسوالی درقد حملات هوایی راه اندازی کرده‌اند، گفت:” مقامات محلی ولایت تخار تحقیقات در این مورد آغاز کرده است و جزئیات آن را به رسانه‌ها شریک خواهد ساخت.”

این اولین بار است که نیروهای هوایی تاجیکستان مواضع مخالفان حکومت افغانستان را هدف قرار می‌دهند.در همین حال خبرگزاری «ریا» به نقل از وزارت دفاع روسیه گزارش داده است که طیاره‌های نظامی این کشور در این عملیات شرکت نداشته اند.

ذبیح الله مجاهد، سخنگوی طالبان این درگیری و بمباران متعاقب آن را تایید کرده، اما گفته که درگیری میان قاچاقبران مواد مخدر و نیروهای تاجیک صورت گرفته است.

خبرگزاری ریانویستی روسیه به نقل از وزارت دفاع این کشور نوشته که طیاره های روسی در این بمباران در شمال افغانستان دخیل نبوده اند.